ᑐᓐᖓᓱᒋᑦ - ᓄᓇᖃᖅᑳᖅᓯᒪᔪᑦ ᑲᑎᒪᖃᑎᒌᓐᓂᖓᑦᑕ ᖃᕆᑕᐅᔭᒃᑯᑦ ᑕᑯᔭᒃᓴᐅᑎᑦᑎᕕᖓᓐᓄᑦ

ᑖᓐᓇ ᖃᕆᑕᐅᔭᒃᑯᑦ ᑕᑯᔭᒃᓴᐅᑎᑦᑎᕕᒃ ᓴᓇᔭᐅᓯᒪᕗᖅ ᐱᑕᖃᖅᑎᑦᑎᔾᔪᑕᐅᓇᓱᐊᖅᓱᓂ ᑲᓇᑕᒥᐅᓄᑦ ᑐᓴᐅᒪᔾᔪᑎᒃᓴᓂᒃ ᐊᒻᒪ ᑎᑎᕋᖅᓯᒪᔪᓂᒃ ᓴᖅᑭᖅᑐᓂᒃ - ᓄᓇᖃᖅᑳᖅᓯᒪᔪᑦ ᑲᑎᒪᖃᑎᒌᓐᓂᖓᓐᓂᑦ ᐊᒻᒪ ᐃᓕᖓᔪᓂᑦ ᖃᐅᔨᒋᐊᒃᑲᓐᓂᕐᓂᕐᒧᑦ ᑖᒃᓱᒧᖓ ᐱᓕᕆᐊᖑᔭᕆᐅᖅᑐᒧᑦ.

ᓄᓇᖃᖅᑳᖅᓯᒪᔪᑦ ᑲᑎᒪᓂᖃᑎᒌᓐᓂᖓᑦ ᐱᑕᖃᓚᐅᖅᑐᖅ ᐋᑐᕚᒥ ᐄᐳᕈ 19, 2004 - ᒥ ᐱᑕᖃᓚᐅᖅᓯᒪᓐᖏᑦᑐᒥᒃ ᐱᕕᑦᓴᖃᕈᑕᐅᓚᐅᖅᐳᖅ ᐃᓚᒋᔭᐅᔪᓄᑦ ᑲᓇᑕᒥ ᒥᓂᔅᑕᓄᑦ , ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎᓄᑦ ᐊᒻᒪ ᑲᓇᑕᐅᑉ ᑲᑎᒪᔨᕐᔪᐊᖏᓐᓄᑦ ᐱᓕᕆᖃᑎᖃᕈᓐᓇᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᓯᕗᓕᖅᑎᖏᓐᓂᒃ ᓇᑭᑐᐃᓐᓈᖅᓯᒪᔪᓂᒃ ᓄᓇᓕᕐᔪᐊᓂᑦ.

ᐄᐳᕈ 19 - ᒥ ᑲᑎᒪᓂᖃᑎᒌᓐᓂᕐᒥ , ᐊᖏᔪᖅᑳᕐᔪᐊᖅ ᑎᓴᒪᑦ ᐱᒻᒪᕆᐅᔪᓂᒃ ᐊᖏᕈᑎᖃᓚᐅᖅᐳᑦ :

• ᐅᓂᒃᑳᓕᐅᕈᑦ ᒥᒃᓵᓄᑦ ᑲᑎᒪᓂᖃᑎᒌᓐᓂᐅᑉ: ᓴᓐᖓᑎᑉᐸᓪᓕᐊᑎᑦᑎᓂᖅ ᐱᓕᕆᖃᑎᒌᓐᓂᕐᒥᒃ, ᑲᓇᑕᐅᑉ - ᓄᓇᖃᖅᑳᖅᓯᒪᔪᑦ ᑲᑎᒪᓂᖃᑎᒌᓐᓂᖓᑦ ᑖᓐᓇ ᓴᖅᑭᑕᐅᓚᐅᖅᓯᒪᔪᖅ ᒪᐃ 20, 2004 - ᒥ.
  
  
• ᐃᓛᒃᑰᖅᑐᓂᒃ ᐅᖃᖃᑎᖃᕐᓃᑦ ᐱᓪᓗᒋᑦ ᐱᖓᓲᔪᖅᑐᑦ ᓯᕗᓪᓕᐅᔾᔭᒃᓴᐃᑦ ᐱᔾᔪᑎᒋᔭᔪᑦ ᓄᓇᖃᖅᑳᖅᓯᒪᔫᖃᑎᒌᓂᒃ, ᐊᕕᑦᑐᖅᓯᒪᔪᓂ ᖃᓪᓗᓈᑦ ᓄᓇᖓᓐᓂ ᐊᒻᒪ ᐅᑭᐅᖅᑕᖅᑐᒥ ᒐᕙᒪᒃᑯᓐᓂᒃ, ᐃᒻᒥᑰᖅᑐᓂᒃ ᖃᐅᔨᒪᔪᕐᔪᐊᓂᒃ ᐊᒻᒪ ᐱᓕᕆᔨᓂᒃ;
  
  
• ᐊᑐᐊᒐᓕᕆᓂᕐᒧᑦ ᕿᒪᕉᑎᓯᒪᓪᓗᑎᒃ ᑲᑎᒪᓂᒃᓴᖓᓄᑦ ᒥᓂᔅᑕᐃᑦ ᑲᑎᒪᔨᖏᑕ ᑲᑎᒪᔨᕋᓛᖏᓐᓄᑦ ᓄᓇᖃᖅᑳᕐᓯᒪᔪᓕᕆᔨᓄᑦ ᓄᓇᖃᖅᑳᖅᑐᓪᓗ ᓯᕗᓕᖅᑎᖏᑦ ᐊᒻᒪ;
  
  
• ᓴᓇᔭᐅᓂᖓ ᓄᓇᖃᖅᑳᖅᓯᒪᔪᓂᒃ ᐅᓂᒃᑳᓕᐅᕈᑎ ᖃᐅᔨᒪᓇᓱᐊᕈᑎᒃᓴᐅᑉ ᐱᕙᓪᓕᐊᓂᕐᒥᒃ.

ᐱᓕᕆᔭᐅᒃᑲᓐᓂᕈᑕᐅᓪᓗᓂ ᑐᒡᓕᐊᓂ ᐊᖏᕈᑎᒋᓯᒪᔭᖓᓄᑦ , ᐊᒥᓱᒐᓚᐃᑦ ᐃᓛᒃᑯᖅᑐᓄᓪᓚᑖᖅ ᐃᓕᖓᔪᓂᒃ ᑲᑎᒪᖃᑎᒌᑕᖃᖃᑦᑕᖅᓯᒪᕗᖅ ; ᑕᒪᒃᑯᐊ ᑲᑎᒪᖃᑎᒌᓐᓃᑦ ᐃᓚᐅᕕᐅᖃᑦᑕᖅᓯᒪᕗᑦ ᓄᓇᖃᖅᑳᖅᓯᒪᔪᓄᑦ ᐊᒻᒪ ᓄᓇᖃᖅᑳᖅᓯᒪᔫᓐᖏᑦᑐᓂᒃ ᖃᐅᔨᒪᔪᕐᔪᐊᓂᒃ ᐊᒻᒪ ᑎᒥᐅᔪᓂᒃ, ᐃᓚᐅᔪᑦ ᑕᐃᔭᐅᓯᒪᔪᑦ ᑲᓇᑕᒥ , ᐊᕕᑦᑐᖅᓯᒪᔪᓂ ᖃᓪᓗᓈᑦ ᓄᓇᖓᓐᓂ ᐊᒻᒪ ᐅᑭᐅᖅᑕᖅᑐᒥ ᒐᕙᒪᓄᑦ ᐊᒻᒪ ᓇᒻᒥᓂᖅ ᐱᓇᓱᐊᕐᕕᓕᓐᓄᑦ ᑭᒡᒐᑐᖅᑎᓄᑦ ᓇᑭᑐᐃᓐᓈᖅᓯᒪᔪᓄᑦ ᓄᓇᓕᕐᔪᐊᓂᑦ. ᐃᓛᒃᑰᖅᑐᓂᒃ ᑲᑎᒪᖃᑎᖃᕐᓂᕐᒥ ᐱᔾᔪᑎᒋᔭᐅᔪᑦ ᒪᑯᐊᖑᓚᐅᖅᐳᑦ: ᐋᓐᓂᐊᓇᓐᖏᑦᑐᓕᕆᓂᖅ, ᐃᓅᓯᓕᒫᖅ ᐃᓕᓐᓂᐊᕐᓂᖅ , ᐃᓪᓗᓕᕆᓂᖅ , ᑮᓇᐅᔭᓕᐅᕈᑎᑎᒍᑦ ᐱᓇᓱᐊᕋᑦᓴᐃᑦ , ᐊᐃᕙᖃᑎᒌᓐᓃᑦ ᐊᒻᒪ ᑲᒪᒋᔭᖃᕆᐊᖃᕐᓂᖅ ᖃᐅᔨᔭᐅᔪᓂᒃ .

ᑕᒪᒃᑯᐊ ᖃᐅᔨᒋᐊᒃᑲᓐᓂᕐᓂᕐᒧᑦ ᑲᑎᒪᖃᑎᒌᓐᓃᑦ ᓯᕗᒧᐊᒃᑎᑕᐅᖃᑦᑕᖅᓯᒪᕗᑦ ᐸᕐᓇᐃᖅᓯᔨᓄᑦ ᑲᑎᒪᔨᕋᓛᓄᑦ ᐃᓚᐅᔪᖃᖅᑐᓄᑦ ᑭᒡᒐᑐᖅᑎᓂᒃ ᓯᕗᓕᐅᕆᔪᓂᑦ ᑲᓇᑕᒥ ᒐᕙᒪᒃᑯᑦ ᐱᓇᓱᐊᕐᕕᖏᓐᓂᑦ( ᐃᓄᓕᕆᔨᑐᖃᒃᑯᑦ ᑲᓇᑕᒥ, ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ, ᓴᓇᕕᓕᕆᔨᒃᑯᑦ ᑲᓇᑕᒥ, ᑲᓇᑕᒥ ᐃᒡᓗᓕᕆᔨᕐᔪᐊᒃᑯᑦ, ᑮᓇᐅᔭᓕᕆᓂᕐᒧᑦ ᑲᑎᒪᔩᑦ); ᑲᓇᑕᒥ ᓄᓇᖃᖅᑳᖅᓯᒪᔪᑦ ᑎᒥᖁᑎᖏᓐᓂᑦ: ( ᑲᓇᑕᒥ ᐊᓪᓚᐃᑦ ᑲᑐᔾᔨᖃᑎᒌᖏᑦ), ᐊᓪᓚᖓᔪᑦ ᑲᓇᑕᒥ ᑲᑎᒪᔨᖏᑦ, ᐃᓄᐃᑦ ᑕᐱᕇᑦ ᑲᓇᑕᒥ, ᑲᑐᔾᔨᖃᑎᒌᖏᑦ ᓄᓇᖃᖅᑳᖅᓯᒪᔪᑦ ᐊᒻᒪ ᓄᓇᖃᖅᑐᑐᖃᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᑦ ᑲᓇᑕᒥ ); ᐊᒻᒪ ᐊᒥᓱᒐᓚᐃᑦ ᐊᕕᑦᑐᖅᓯᒪᔪᓂᑦ ᖃᓪᓗᓈᑦ ᓄᓇᖓᓐᓂᑦ ᐊᒻᒪ ᐅᑭᐅᖅᑕᖅᑐᒥ ᒐᕙᒪᒃᑯᓐᓂᑦ ᐱᓕᕆᓚᐅᖅᑐᑦ ᐱᓕᕆᖃᑎᒌᒃᓱᑎᒃ ᐱᕙᓪᓕᐊᑎᑦᑎᓇᓱᐊᖅᓱᑎᒃ ᐊᒻᒪ ᐊᑐᓕᖅᑎᑦᑎᓇᓱᐊᖅᓱᑎᒃ ᐊᑐᓂᑦ ᑲᑎᒪᖃᑎᒌᓐᓂᕐᓂᒃ. ᐱᒻᒪᕇᑦ ᖃᓄᐃᓯᒪᓂᖏᓐᓄᑦ ᑎᑎᖅᑲᐃᑦ ᓴᓇᔭᐅᓯᒪᔪᑦ ᐃᓚᒋᔭᐅᔪᓄᑦ ᐸᕐᓇᐃᖅᓯᔨᑦ ᑲᑎᒪᔨᕋᓛᖏᓐᓄᑦ ᓯᕗᓂᖏᓐᓂ ᑲᑎᒪᖃᑎᒌᓐᓃᑦ, ᐊᒻᒪᓗᑦᑕᐅᖅ ᐃᓛᒃᑰᖅᑐᖅ ᐱᔭᒃᓴᐅᑎᑦᑎᔨᑦ ᐅᓂᒃᑳᓕᐅᕈᑎᖏᓐᓂᒃ ᒥᒃᓵᓄᑦ ᐊᑐᓂᑦ ᑲᑎᒪᖃᑎᒌᓐᓃᑦ ᐊᒻᒪᓗᑦᑕᐅᖅ ᑭᖑᓪᓕᖅᐹᒥ ᐅᓂᒃᑳᓕᐅᕈᓂᒃ ᐊᑐᐃᓐᓇᕈᖅᑕᐅᓯᒪᔪᓂᒃ ᐱᓕᕆᖃᑎᒌᓐᓄᑦ ᑲᑎᒪᖃᑎᒌᓐᓂᕐᒥ ᐱᔭᒃᓴᐅᑎᑦᑎᔨᓄᑦ ᑕᒪᐃᑕ ᐊᑐᐃᓐᓇᐅᕗᑦ ᖃᕋᓴᐅᔭᒃᑯᑦ ᐅᕙᓂ ᑕᑯᒃᓴᐅᑎᑦᑎᕕᒻᒥ.

ᐃᓚᒋᔭᐅᔪᑦ ᐸᕐᓇᐃᖅᓯᔨᓄᑦ ᑲᑎᒪᔨᕋᓛᓄᑦ ᐊᑐᐃᓐᓇᕈᖅᓴᐃᓯᒪᑐᐃᓐᓇᕆᐊᖃᖅᐳᑦᑕᐅᖅ ᓴᖅᑭᑦᑐᓂᑦ ᐅᖃᐅᓯᒃᓴᓂᒃ ᐊᒻᒪ ᑎᑎᕋᖅᑕᐅᒋᐊᓐᖓᖅᓯᒪᔪᓂᒃ ᐅᓂᒃᑳᓕᐅᕈᑎᓂᒃ ᐱᒋᐊᖅᓯᒪᔪᓂᒃ ᑖᒃᓱᒪ ᑲᔪᓯᕙᓪᓕᐊᓂᖓᓂᑦ , ᑕᒪᒃᑯᐊ ᑕᐃᒎᓯᐅᔪᑦ ᓇᓂᔭᐅᑲᐅᖅᑐᕈᓐᓇᖅᐳᑦ ᐱᑐᒡᓗᒍ ᖃᕆᑕᐅᔭᐃᑦ ᑭᓱ ᓄᑖᖑᕙᒧᑦ .

ᑎᑎᕋᖅᑕᐅᓯᒪᔪᑦ ᑕᒪᒃᑯᓇᓐᖓᑦ ᑲᑎᒪᖃᑎᒌᓐᓃᑦ ᐊᑐᖅᑕᐅᔪᓐᓇᖅᐳᑦ ᑐᓴᖅᑎᑦᑎᔾᔪᑕᐅᓇᓱᐊᕐᓗᑎᒃ ᓯᕗᓂᑦᑎᓐᓂ ᐱᕙᓪᓕᐊᑎᑦᑎᔪᖃᖅᑎᓪᓗᒍ ᓄᓇᖃᖅᑳᖅᓯᒪᔪᓄᑦ ᐊᑐᐊᒐᕐᒥ ᑲᓇᑕᒥ ᐊᒻᒪ ᐱᒻᒪᕆᐅᓂᐊᖅᐳᑦ ᑎᑎᖅᑲᐅᓗᑎᒃ ᐃᓱᒪᒋᔭᐅᔪᒃᓴᐅᓗᑎᒃ ᑲᑎᒪᓂᕆᒐᔭᖅᑕᖏᓐᓂᒃ ᒐᕙᒪᒃᑯᑦ ᐊᒻᒪ ᓄᓇᖃᖅᑳᖅᓯᒪᔪᑦ ᓯᕗᓕᖅᑎᖏᑕ ᑕᐃᒃᓱᒪᓂᓗ ᐊᑐᐊᒐᓕᕆᖃᑎᒌᓐᓂᒃᓴᒥ ᐅᐱᕐᖓᑦᓵᒃᑯᑦ 2005 - ᒥ ᐊᒻᒪ ᑲᓇᑕᐅᑉ ᐊᕕᑦᑐᖅᓯᒪᓂᖏᓐᓂ ᐊᖏᔪᖅᑳᕆᔭᐅᔪᑦ ᑲᑎᒪᖃᑎᖃᕐᓂᖓᓐᓂ ᓄᓇᖃᖅᑳᖅᓯᒪᔪᑦ ᓯᕗᓕᖅᑎᖏᓐᓂᒃ ᒥᒃᓵᓄᑦ ᓄᓇᖃᖅᑳᖅᓯᒪᔪᓄᑦ ᐃᓕᖓᒧᑦ ᐸᕐᓇᑕᐅᔪᖅ ᐅᑭᐊᒃᓵᒧᑦ, 2005 - ᒥ.

ᐱᑕᖃᖅᑐᑦ ᑖᒃᓱᒪᓂ ᐃᓐᑐᓂᐊᑦᒥ ᑕᑯᔭᒃᓴᐅᑎᑦᑎᕕᒻᒥ ᓴᖅᑭᔮᕈᑕᐅᕗᑦ ᐃᓱᒪᒋᔭᖃᕈᓯᒻᒪᕆᓐᖏᑕᖏᓐᓄᑦ ᒐᕙᒪᒃᑯᑦ ᐅᕝᕙᓘᓐᓃᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᑎᒥᖁᑎᖏᓐᓄᑦ. ᐱᔾᔪᑎᖃᖅᐳᖅ ᑖᓐᓇ ᐃᓐᑐᓂᐊᑦᒥ ᑕᑯᔭᒃᓴᐅᑎᑦᑎᕕᒃ ᐱᔭᒃᓴᐅᑎᑦᑎᓇᓱᐊᕐᓂᕐᒥᒃ ᑐᓴᐅᒪᔾᔪᑎᒃᓴᓂᒃ ᐃᓕᖓᔪᓂᒃ ᑲᓇᑕᐅᑉ-ᓄᓇᖃᖅᑳᖅᓯᒪᔪᑦ ᑲᑎᒪᓂᖃᑎᒌᓐᓂᖓᓐᓄᑦ : ᖃᓄᐃᓯᒪᓂᖓᓄᑦ ᑎᑎᖅᑲᐃᑦ, ᐱᔭᒃᓴᐅᑎᑦᑎᔨᑦ ᐃᓛᒃᑰᖅᑐᓄᑦ ᐊᒻᒪ ᑭᖑᓪᓕᖅᐹᒥ ᐅᓂᒃᑳᓕᐅᕈᑎᖏᑦ , ᑲᑎᒪᔾᔪᑎᒃᓴᐃᑦᐅ ᐊᒻᒪ ᐱᕙᓪᓕᐊᔪᓕᕆᔨᓂᒃ ᑐᓴᖅᑎᑦᑎᔾᔪᑎᑦ.

ᐅᑎᕐᓗᑎᑦ ᐱᒋᐊᕐᓂᖓᓄᑦ